.:.:.:.:.: دايت فى دايت :.:.:.:.:.

"يوووووووووووووووووووووه ........ كل يوم من الأكل ده "
أنا بصراحة قرفت ياماما .........؟!!!!
ولقيت مامتى بتضحك عليا وبتقول ........ " يعنى كان حد ضربك على أيدك.....؟!!!!"
المهم ........ بصيت على الأكل ولقيت - خير اللهم أجعله خير - طبق مدوّر وحلو كده وأمور ع الترابيزة وفيه بيضة ..........!!!!!!!
وجنبة ورغيف سن يدوب كدة يأكل عيل صغير عندة 6 شهور ( العيل طبعا مش رغيف العيش) 
" أمرى لله بقى " ........... مهو مفيش أكل فى نظام الدايت بتاعى غير كده 
وقعدت وقتها أسأل نفسى أنا أية اللى خلانى أساسا أعمل دايت ........؟!!!!
" البيض المسلوق هو العمود الأساسى لنظام الدايت السليم لأنة قليل السعرات " 
ده كان كلام الدكتور اللى كان لازم أسمعة وأمشى علية .........
عدى بتاع أسبوع على النظام دة وكل يوم الصبح بيض مسلوق ......... بيض مسلوق ......... بيض مسلوق ......... 
لغاية ماجبت آخرى و كنت ............. هكره البيض المسلوق وغير المسلوق ........!!!!!!
والغدا ......... ياسلام ع الغدا ياسلام 
أربع معالق رز أو مكرونة - الله يرحم - نص الحلة بالظبط كنت بخلصها لوحدى 
والعشا ........... آكل بردة ربع رغيف وحتة جبنة ..... بسم الله ماشاء الله واللهم لاحسد 
زماااااااااااااااااااااان كان العشا دة مقدّس بالنسبة ليا وكان يعتبر الوجبة الاساسية .......
يعنى يادوب كده كنت باكل بتاع اتناشر تمنتاشر رغيف فى العشا ...... وغيره وغيره ...... يعنى كان الاكل يتسمى أكل 
ياحسرة على دلوقتى ...........!!!!!!!!
كوبايتين مية قبل الاكل ............ وكوباية فى وسط الأكل ......... وطبق سلطة كبيييييييييييييييييييييييير قبل الغدا 
وبعدين نبدأ ناكل .......... ناكل أية بقى .......؟!!!!!
ما بطنى بقت مليانه مية وطماطم وحاسس أن دماغى هتزرّع ............!!!!!!!
وبين الوجبات أكيد لازم يكون فية أكل أمال اية أحنا مش بنلعب دا دايت بقى .........
بين الوجبات ثمرة فاكهة .........؟؟؟؟؟؟
بسسسسسسسسسسسسسسسسسسسسسسس؟؟؟؟؟؟
الله يرحم الواحد كان بيخلص فى اليوم بتاع اتنين كيلو فاكهة أو أكتر موز على برتقال على فراولة .... أيام وراحت لحالها .....
ولو عايز أشرب شاى يبقى من غير سكر ......... يانهارأبيض ........!!!!!!
من غير سكر ............. لييييييييييية .....؟!!!!!
دأنا كنت بجيب السكرية وبحط فيها المية و الشاى ............. وتقوللى من غير سكر .....؟!!!!!
ودى كانت حكايتى مع أول أسبوع دايت ليا بعد حرمانى من جميع أنواع المقرمشات والمشهيات والـــ ........ والـــ ........ والـــ ........ والـــ ........ والـــ ........ والـــ ........ والـــ ........ والـــ ........ والـــ ........ والـــ ........ 

أما دلوقتى بقى هحكيلكم حكايتى مع واحد بحبة فى الله ........
................ د / يحيــــــى التملــــــى .....................

 فى يوم كنت رايح ليحيى علشان أعمل معاه جدول مذاكرة - فكرة مجنونة بس هتنجح - ودى من الحاجات اللى اتعلمناها فى اللجنة بتاعتنا أن الافكار المجنونة هيا اللى بتنجح وأتعلمنا ازاى نعمل جداول مش مشكلة التنفيذ بس نبقى عملنا جدول ودى خطوة مبدأية والتنفيذ مسيرة هييجى فى يوم م الأيام ..........
رحت ليحيى وبيتة فى الدور الأتناشر فى عمارة الشرق والعمارة فيها أسانسير واحد بس اللى شغال وتلاتة عطلانين فطبعا ده معاناه فى حد ذاتها لكل مستخدمى الاسانسير .........
وصلت عندالعمارة ورنيت ليحيى علشان ينزل مرة واتنين وتلاتة وأر ......... 
ولكن هيهات .....!!!!!!
قلت خلاص مبدهاش بقى وأتصل بيه 
بردة مرة وأتنين وتلاتة وأر ............ 
وبردة هيهات ............!!!!!!!
بتاع أكتر من ربع ساعة ومحدش يرد ومحدش نزل ...........
فقلت أكيد الموبايل بتاع يحيى فى البلكونة ، فى الدولاب ، تحت المرتبة ، فى الزبالة يعنى أى حاجة م الأماكن التقليدية اللى يحيى بيحط فيها الموبايل بتاعة ............!!!!!!!!
فقررت احد القرارات العظيمة
قررت أنى أطلع - بالأسانسير طبعا - ووقفت قدام الاسانسير العقيم بتاع العمارة مستنى الفرج 
وأول لما فتح الاسانسير لقيت يحيى فى وشى وكان سعيد كالعادة وبيبتسم الابتسامة المميزة بتاعتة 
فقلت أحمدك يارب فقاللى تعالى نطلع فوق مع اننا متفقين أننا ننزل مع بعض 
طبعا مكنتش هقعد اتناقش معاه ونطيت فى الاسانسير بسرعة لأنة لو طلع مهواش نازل ولا بعد بكرة وخصوصا أنة مبيقفش الا فى الادوار الفردية ............. غتاتة يعنى .......... ( بس عملوا واحد للزوجى جديد )
وجوا الأسانسير يحيى قاللى كلمة جننتنى وزهقتنى من الاسانسير بتاعهم أكتر وأكتر وأكتر 
قاللى ......... أنا واقف قدام باب الأسانسير من بعد اول رنة ...................!!!!!!!!
المهم ......... دخلنا شقة يحيى ولقينا جذمة نضيفة أوى ومتلمعة 
فقلتلة جذمتك دى يايحيى .........؟!!!!!
فقاللى طبعا لأ ............... يابنى أنا شخصية ملحوسة ..........!!!! 
وقهقه ............!!!!!!!
ودخلت اوضة يحيى وياريتنى مادخلت .........
أوضة منظمة جدا جدا جدا جدا جدا  
ومرتبة بردة جدا جدا جدا جدا جدا 
أخو يحيى جابلنا عصير انا كنت فى أول يوم من الدايت فما شربتش العصير 
فراح يحيى علشان يعمللى شاى بسكر فركتور " سكر الريجيم " فلحسن حظى لقى الفركتوز خلصان
فخليتة يعملة من غير سكر وكانت أول مرة أشرب الشاى من غير سكر خاااااااااااااااااالص.........!!!!!!
وأخونا يحيى - اللى هيهات م الصبح - كان عايز يعمل دايت فسألنى أنت بتاكل أية ...؟؟؟
فقلتلة .........
الفطار :- رغيف سن + طبق سلطة + بيضة مسلوقة أو جبنة أو 3 معالق فول
الغدا :- قطعة لحم او فراخ أو سمك + 4 معالق رز أو مكرونة + طبق سلطة 
العشا :- رغيف سن + طبق سلطة + بيضة مسلوقة أو جبنة
فلقيت يحيى بيقول ليا وبراءة الاطفال فى عينية ........
مينفعش الحاجات دى كلها على بعضها ..........!!!!!!!
وكالعادة قهقه بصوت عالى 
ولكن بدأ الريجيم من تانى يوم 
ويومها نزل مشوار الساعة 8 الصبح من غير فطار ورجع الساعة 11:30  
فقال أنا هفطر رغيف سن وحتة جبنة 
فكلهم ولقى نفسة لسة جعان ...........!!!!!!
فقال هاخد كمان بيضة 
فكلها ولقى نفسة لسة جعان ...........!!!!!!
فقال خلاص أنا هاكل كمان 3 معالق فول 
فكلهم ولقى نفسة لسة جعان ........!!!!!!
المهم فى النهاية عمل ذى ماكان عايز يعمل " أكلهم كلهم "
دى كانت حكايتى انا يحيى و الريجيم 
واتمنى انكم تكونوا استفدتم 
والى لقاء آخر وموقف آخر من مواقف الحياه

ملحوظة : الريجيم دة نظام فااااااااااااااااااشل !!!